Davart l’institut
L’Institut dal Dicziunari Rumantsch Grischun (IDRG) cun sedia a Cuira edescha il Dicziunari Rumantsch Grischun (DRG), il pli grond vocabulari rumantsch. En questa ovra vegn documentà e descrit l’entir stgazi da pleds dapi il 16avel tschientaner fin oz da tut ils idioms e dialects inclusiv la lingua discurrida. En tala moda renda il dicziunari accessibla ina part impurtanta da l’ierta linguistica dal Grischun e la tegna en salv per las generaziuns vegnintas.
Rimnar e documentar lingua
A partir dal 20avel tschientaner han ins cumenzà a rimnar sistematicamain material linguistic dal rumantsch. Da cedels che vegnivan scrits a maun a l’entschatta è sa sviluppada ina cartoteca singulara che cumpiglia oz bel e bain duas milliuns attestaziuns. Sin questa basa vegnan redigids ils artitgels dals singuls chavazzins.
Salvar e metter a disposiziun lingua
Il DRG è in vair stgazi per in e scadin che s’interessescha per il rumantsch, saja per far retschertgas, sco punct da partenza per intermediar temas istoric-culturals, per s’infurmar davart l’agen dialect u simplamain per l’amur da la lingua – tgi che tschertga en il DRG, chatta.
Ina squadra pitschna cun gronda passiun e cumpetenza
Il DRG – quai signifitga blera lavur che vegn fatga d’ina squadra cumpetenta cun gronda passiun. Ultra da la lavur redacziunala per propi infurmain nus davart nossas activitads, essan preschents regularmain en las medias e respundain a dumondas en connex cun il rumantsch e sia istorgia e cultura.
Da chasa a Cuira – avert per visitadras e visitaders
Noss institut a la Ringstrasse 34 a Cuira è il dachasa da la redacziun dal DRG. Là chatt’ins er il post da documentaziun il pli ritg insumma per la lingua rumantscha. Las collecziuns, la biblioteca e la fototeca èn avertas per la publicitad suenter preannunzia. Tenor giavisch purschain nus era visitas guidadas.
