Davart las Annalas
Las Annalas da la Societad Retorumantscha cumparan dapi il 1886 ina giada l’onn sco forum impurtant per publitgar artitgels scientifics e popular-scientifics davart la lingua, litteratura, cultura ed istorgia rumantscha. En pli renda l’annuari fin oz accessibels texts da fasas pli veglias dal rumantsch.
L’emprim numer da las Annalas è vegnì publitgà gia curt suenter la fundaziun da la Societad Retorumantscha. Dapi lura èn cumparidas passa tschient annadas – in archiv singular che documentescha l’interess multifar e vast per l’occupaziun cun il rumantsch en tut sias varietads. Oz èn tut las ediziuns da las Annalas accessiblas gratuitamain sin la plattafurma online E-Periodica.
Las Annalas rendan vesaivla la diversitad linguistica e culturala dal rumantsch, promovan il barat tranter la scienza, la cultura e la societad ed animeschan perscrutadras giuvnas e perscrutaders giuvens da publitgar lur retschertgas e lavurs.
Las Annalas n’èn betg mo in annuari cun ina ritga tradiziun, mabain er in organ da publicaziun modern: stampà, digital ed accessibel libramain. Ellas èn in forum renconuschì da la scienza ed in instrument impurtant per intermediar ils differents aspects da la lingua e cultura rumantscha.
