S’inscriver per la newsletter
La cartina #2
Savais Vus tge ch’è in «losenduva»?
Charas amias e chars amis da la lingua rumantscha
Losenduva … Quai tuna curius, navair? Ussa be tadlai! U legiai la cartina. E lura vegn la soluziun.
Invit a la radunanza annuala da la SRR
Venderdi, ils 19 da zercladur 2026, a las 18:30, ha lieu a Cuira en la Sala Muntanella da la Chasa RTR la radunanza annuala da la SRR. Sco commembra u commember retschavais Vus proximamain l’invit.
Suenter la part statutara suonda il program public. En il referat «Pertge dovra RTR ina linguista?» tematisescha Marietta Cathomas midadas da la lingua e furmaziuns da pleds en connex cun sia lavur sco linguista dad RTR. Ladina Brülhart accumpogna il program musicalmain cun sia violina.
Nus avessan plaschair d’As pudair beneventar a la radunanza, al referat ed al barat a chaschun da l’aperitiv.
… ma: Tge fa la SRR atgnamain durant in onn ora?
Ils rapports annuals pudais Vus telechargiar qua.
👉 Dal rest: Ils rapports annuals vegnan publitgads en las Annalas. Sco commembra u commember da la SRR retschavais Vus il rapport annual era persunalmain – inclus ina contribuziun supplementara or da l’activitad da la SRR e da l’lDRG, p.ex. in referat u in’istorgia d’in pled.
Davart la lavur vi dal DRG
«Tü gessast bain per ir a clamar la mort!» Cura din ins quai ad ina persuna? Tgi u tge è l’ «anguel da la mort»? E tge signifitga «haver la mort silla lieunga»? Per l’artitgel «mort» dal DRG è il chauredactur Ursin Lutz s’occupà intensivamain dad expressiuns e locuziuns che han da far cun la «mort». L’artitgel cumplet pon ins leger a partir da quest atun. Ma en l’emissiun «Marella» dad RTR dat Ursin Lutz gia in insatg da la mort en il linguatg: «Da giazlas sin tetg, nufs en las soccas e paintg culà».
Losenduva cun in tip …
E tge è uss in «losenduva»? – Quai è in baubuzi ch’i dat be a Domat. Il pled deriva da la chanzun dal guitader (Nachtwächter): «Losend uffa, was ich euch will sagen / der Hammer hat zehn (elf, zwölf) Uhr g’schlagen» (DRG 11 «losenduva»)
… per il DRG-online (online.drg.ch):
Essas Vus a la tschertga dad auters baubuzis? Lura endatai il chavazzin tudestg Schreckgespenst (u Gespenst u Popanz) en la fanestra da tschertgar e – attenziun! – betg smatgai immediat Enter, mabain spetgai in zic, fin che cumparan las propostas per differents artitgels. Suenter avair cliccà sin «Mussar tut ils resultats», pudais Vus tscherner l’artitgel che interessescha Vus – sa chapescha be quels fin la letra M.
La Societad Retorumantscha (SRR) è la pli veglia uniun rumantscha ed ella lavura vinavant per ina perscrutaziun persistenta da la lingua e cultura rumantscha.
Vulais era Vus far part da la SRR e survegnir regularmain infurmaziuns ed invits ad occurrenzas davart la lingua e cultura rumantscha?
