Reglament
concernent l’Institut dal Dicziunari Rumantsch Grischun
1. La Societad Retorumantscha (SRR) è purtadra da l’Institut dal Dicziunari Rumantsch Grischun (IDRG); ella tgira ed edescha il Dicziunari Rumantsch Grischun (DRG), in dals quatter Vocabularis naziunals (cf. art. 4 dals statuts da la SRR).
2. L’IDRG vegn finanzià dal maun public, numnadamain da la Confederaziun (ASSU) e dal chantun Grischun (Uffizi da cultura), ed entras la vendita dad agens products. La SRR generescha entradas cun contribuziuns da commembradis e po acquirir ulteriuras funtaunas finanzialas.
3. L’IDRG rimna, cataloghisescha e maina la documentaziun per edir il DRG en furma da fascichels e toms resp. en furma digitala.
Ultra da quai è l’IDRG in center da cumpetenza da muntada naziunala ed internaziunala per la perscrutaziun scientifica da la lingua e da la cultura rumantscha (cf. art. 23 dals statuts da la SRR).
4. Il DRG vegn elavurà confurm a las directivas per ils quatter Dicziunaris naziunals.
5. Las plazzas vacantas da l’IDRG vegnan per regla publitgadas en libra concurrenza.
6. L’IDRG vegn manà d’in chauredactur u d’ina chauredactura/mainafatschenta che vegn elegì/elegida da la suprastanza da la SRR. Quella persuna è responsabla per l’organisaziun e la gestiun integrala da l’IDRG, numnadamain per la lavur scientifica ed operativa.
Il/la mainafatschenta recrutescha ed engascha il persunal da l’IDRG. Per la recrutaziun dal persunal scientific consultescha el/ella la Cumissiun filologica. El/ella infurmescha il/la president/a da la SRR davart engaschaments da persunal.
El/ella è la persuna da contact da la/dal president/a da la SRR.
Il/la mainafatschenta vegn sustegnì/sustegnida en tut la gestiun d’in/a substitut/a.
Il/la mainafatschenta represchenta l’IDRG vers anora.
7. Per la gestiun sa drizza l’IDRG tenor:
- l’urden da lavur per l’Institut dal Dicziunari Rumantsch Grischun (IDRG)
- il reglament da pajas per il persunal da l’Institut dal Dicziunari Rumantsch Grischun (IDRG)
- il reglament da spesas per il persunal da l’Institut dal Dicziunari Rumantsch Grischun (IDRG)
- ils carnets da duairs per ils emploiads e las emploiadas da l’IDRG
8. Premess che avunda resursas persunalas e finanzialas sajan avant maun, sa participescha l’IDRG er ad autras incumbensas en favur da la SRR, numnadamain la publicaziun da las Annalas da la Societad Retorumantscha e da la retscha scientifica Romanica Rætica.
9. L’infrastructura da l’IDRG (biblioteca, cartotecas, collecziuns da fotografias ed autras sco era tut il material scientific) èn proprietad da la SRR.
10. Quest reglament è vegnì approvà da la suprastanza da la SRR ils 12 da mars 2026 e remplazza quel dals 24 da settember 2004. El entra en vigur il 1. d’avrigl 2026.
