Reglament

Romanica Rætica – perscrutaziun da l’intschess rumantsch

1. La Romanica Rætica, edida dapi l’onn 1977 da la Societad Retorumantscha (SRR), è la suletta retscha scientifica che sa deditgescha exclusivamain a la perscrutaziun da l’intschess rumantsch cun publitgar lavurs monograficas davart linguatg, cultura ed istorgia. La retscha vul era dar a giuvens e giuvnas scienziadas rumantschas ina plattafurma per publitgar lur dissertaziuns.

La Romanica Rætica cumpara en in ritmus da publicaziun liber.

Sco linguatgs da publicaziun vegnan per regla acceptads ils quatter linguatgs naziunals.

2. La suprastanza da la SRR è responsabla per la part strategica. Ella decida davart la recepziun dad in’ovra en sia retscha Romanica Rætica. Tras quai daventa la SRR editura da l’ovra.

3. L’Institut dal DRG è responsabel per la part operativa. Il manual d’ediziun regla ils aspects operativs e pratics tranter il/la cedent/a da l’ovra e l’IDRG.

4. Il/la cedent/a da l’ovra procura entiramain per la finanziaziun da la producziun dal cudesch.

Sin dumonda po la SRR dar in sustegn finanzial limità, sche la situaziun finanziala permetta quai.

Ella po era sustegnair il/la cedent/a da l’ovra en sias stentas da chattar meds da finanziaziun. La SRR na surpiglia dentant betg in eventual deficit en connex cun la producziun dal cudesch.

5. La collavuraziun tranter il/la cedent/a da l’ovra e la SRR/l’IDRG vegn fixada en in u plirs contracts che reglan l’ediziun sco tala sco era la vendita e la magasinaziun.

6. Coediziuns èn da principi pussaivlas. En tals cas vegnan ils detagls da collavuraziun (cumpetenzas, responsabladads, finanzas) fixads en ina cunvegna.

7. Quest reglament è vegnì approvà da la suprastanza da la SRR ils 12 da mars 2026 e remplazza quel dals 22 da matg 2023. El entra en vigur il 1. d’avrigl 2026.